May
21
Liejer deplù
SCOLA PRUFESCIUNELA PER LARTEJANAT ARTISTICH
La scola pieta na formazion tradiziunela y pratica ma mpo urienteda al daunì ti ciamps dla scultura y dl depënjer tradiziunel, nduré y depënjer decuratif. La se tën a n cunzet formatif globel che tol en cunscidrazion sibe savëi teorich y pratich coche nce na formazion generela lergia y trasmët cuntenuc spezifics liei ala prufescion tl ciamp dl artejanat artistich. La scola sustën y porta inant capaziteies artejaneles y artistiches, crieia lerch per ancuntedes intercultureles, mët a jì cuncorsc y mostres, y la mantën cuntac cun l mond dl lëur y dla prufescion tres ajurnamënt prufesciunel. Chësc ti dà l mesun al-a laurant-a de ti vester ala ghiranzes for majeres sun la stiera y de savëi da les manejé.
Tla Scola prufesciunela vëniel uni ann pità n diesc cursc curc, pra chëi che l ie dlongia de tei sun tecniches de basa tl dessëni, depënjer, ziplé y turné, nce cursc speziei per progredii tl dessëni y mudelé act tenii da artisć cunescui y pra chëi che fej pea scultëures, moleri y de tei che lëura tl ciamp dl artejanat artistich.
La Scola prufesciunela per l artejanat artistich pieta coche scola a tëmp plën cun la doi sezions de Scultura y Depënjer tradiziunel, nduré y pitura decurativa l mesun de stlù ju do trëi, cater o cin' ani, y aldò possen arjonjer l atestat per pudëi lauré, l diplom de formazion ala prufescion y l diplom dl Ejam de Stat (de maduranza). Tl prim ann scolastich mpera la sculées y i sculeies ti lauratueresc de tramedoi sezions, acioche l sibe plu saurì crì ora la sezion per i ani che vën do. Per unì tëuc su tla cuinta tlas, che mëina al Ejam de Stat, muessen fé n test dla cumpetënzes ala fin dl cuarto ann scolastich.
La scola nsënia nce ju lerneri ti ciamps de scultura, ziplé, depënjer figures, nduré y scultura decurativa se nuzan dl sistem duel (mpreja-scola). La jëunes y i jëuni dëssa unì istruii y sustenii tl ambit creatif, artistich y artejanel. Nosta scola ti dà mpurtanza ala cunlaurazion cun mprejes, lies de prufesciunisć, genitores y cun d'autra scoles. Ala sculées y ai sculeies ti dan l mesun de avëi dlongia materies de cultura generela nce na formazion pratica che ti dà na gran lerch ala proietazion individuela y creativa. N cëla dantaldut de sustenì la capaziteies artejaneles, l lauré autonomamënter y l spirt critich.
