Departimënt Istruzion, Furmazion y Cultura ladina

La scoles ladines cun si sistem scolastich paritetich se defrenzieia n gran pert dal'autra scoles dl Südtirol. Perchël iel mpurtant avëi na istituzion de referimënt che cunësc duta ndesfidedes cunliedes a chësc sistem. La Ntendënza y Cultura ladina sopieia duta la scoles ladines te na zopa de ciamps: sustëni tl ambit didatich tres l lauré ora de materiai de nseniamënt tl lingaz ladin, cursc de ajurnamënt per l corp nseniant, promozion de ativiteies cultureles y artistiches, y mo truep deplù. Oradechël lëura la Ntendënza y Cultura ladina nce deberieda cun la Direzion Istruzion y Formazion tudëscia y taliana, chësc per purté for inò inant la scola.