Workshop - Nteligënza artifiziela

Per fé crëscer nteresc speziei à la Repartizion Didatica y Cunsulënza dat l mesun a sculées y sculeies talentei y mutivei de tò pert ai Dis di talënc, na scumenciadiva per auzé ora y dé n impuls ai talënc. Da mierculdi, ai 4 nchina juebia, ai 5 de dezëmber 2024 ie n valguni de nosta sculées y sculeies dla terza y cuarta tlasses stac tla Cësa de formazion Ciastel Rechtenthal a Tramin.Ve repurton tlo cie che doi sculeies che à tëut pert al workshop sun la  temarica "IA y cie che ie vëira, bon y bel" nes à cuntà.

Ntervista a LIAM NOEL MARSONER dla 3ª tlas dla scola per l artejanat artistich "La Prufesciunela".

Savoves'a tu bele dan l workshop velch sun la inteligënza artifiziela?

Ie ove bele audì n valguna cosses sun chësta tematica y la ove nce bele nuzà uni tant per lauré ora tesć limpea. Ma l plu ei propi mparà pra chësc workshop.

 Co fova fa urganisà l workshop "IA y cie che ie vëira, bon y bel"?

L di metova man cun na ntroduzion teorica sun la tematica dl di. Dopro se on sper la majera pert giamià ora sun la tematica y on fat eserzizes pratics. On per ejëmpl purtá tesć y i on lascei lauré ora da l’inteligënza artifiziela. I tesć ie uni cumedei ora, peró la maiuranza di partezipanc fova dla minoga che i ne fova nia plu tan uriginei.

 Tratan la tematica dla belëza, mienes'a tu che la inteligënza artifiziela ie bona de ntënder y de  crië “belëza"?

Ie rate che la nteligënza artifiziela ne sarà mei bona de ntënder cie che ie la belëza. La belëza ie da giaté – coche dij n zitat- ti uedli de chël che cëla y la ne possa nia unì nterpreteda da na mascin. Oradechël ne possa la inteligënza artifiziela nia ruvé sun idées persuneles y nce no nventé na belëza nueva. La possa mé fé do belëza che ie bele, ma chësta ne avrà mei la fazion de na belëza sentida y crieda da na persona.

Ce lerch tulerà pa ite la inteligënza artifiziela te ti daunì sibe prufesciunel che privat?

Ie ne rate nia che la inteligënza artifiziela me jove truep te mi daunì da scultëur. Dal mumënt che tl ert dl ziplé se tratel de dé tramandé n savëi che va da generazion a generazion y l ie de bujën de fé scialdi esperienzes pratiches, me nmagini che la inteligënza artifiziela ne ie mo nia al’autëza de fé do chësta tecniches artistiches. Te mi vita privata ti dajerei na majera lerch a l‘inteligënza artifiziela. Ie me lasceré ispiré a scrì tesć, acioche i sibe miëures y me nuzeré nce dl servisc de scrì respostes automatiches a e-mails.

Ntervista a DEMIAN MILOUD WARASIN dla 5ª tlas dl lizeum d’ert "Cademia".

Ciuldì te es'a mpensà de tò pert al workshop "IA y cie che ie vëira, bon y bel"?

Dat na sburdla me à dantaldut la ueia de pustejé y giamië ora minonghes cun d'autra jënt.

Ce cuntenuc y ncëries te à pa tucà l plu?

A mi me à mpresciunà l plu tan debota che la inteligënza artifiziela mpera cosses leprò y tan de gran progresc che la à fat ti ultimi doi ani.

 Tratan la tematica dla belëza, mienes'a tu che la inteligënza artifiziela ie bona de ntënder y de  crië "belëza"?

Do mi ntënder ne sarà la inteligënza artifiziela mei bona per n da vëira de ntënder cie che ie belëza, davia che la mpera mé tres la informazions cun chëles che la vën vejeleda. Chël ulëssa dì che la spiedla mé n ideal o na mesaria dla minonghes de d'autri. Oradechël ie la belëza sogetiva y la ie dloncora da giaté, cossa che la inteligënza artifiziela ne ie marati nia bona de ntënder.

Cie te toles'a tu pea persunalmënter da chësc workshop?

Ie me é rendù cont che i progresc tla tecnologia va inant scialdi plu aslune de chël nëus raton y che ie minove. Ie resteré for scialdi desfidënt n cont dla inteligënza artifiziela, nce sce la sarà bonamënter de gran aiut te cër ciamps, coche tla medejina.